Ի՞նչ հայկական պրեմիերաներ են սպասվում մինչև 2025-ի ավարտը

Այս տարվա աշունն ու ձմեռը խոստանում են իսկական հայկական կինոմարաթոն 🍿 ԿինոՊարկի մեծ էկրանին կբացվեն պատմություններ, որոնցից յուրաքանչյուրն ունի իր մթնոլորտը՝ երբեմն լուրջ ու հուզիչ, երբեմն էլ թեթև ու զվարճալի։ Դրամաներ, կատակերգություններ, սպորտային ու երաժշտական պատմություններ՝ առաջիկա ամիսները լինելու են լի հայկական պրեմիերաներով, որոնցից դժվար կլինի ընտրել միայն մեկը 🎬 🕵️‍♂️ «Գողություն հայկական ձևով» | Սեպտեմբերի 4 Ռեժիսոր Դավիթ Գրիգորյանի արկածային կրիմինալ կատակերգությունը ներկայացնում է ընկերների խմբի պատմությունը, որոնք Հնդկաստանում իրականացնում են իրենց վերջին հանցագործությունը։ Նրանք ուզում են ընդմիշտ հեռանալ այդ կյանքից, բայց ճակատագիրը նրանց տեղափոխում է Երևանի սիրտ՝ նոր, վտանգներով ու անակնկալներով լի «առաքելության»։ Հետապնդումներ, կատակներ և անսպասելի շրջադարձեր. այս ամենն արդեն կարող ես դիտել ԿինոՊարկի մեծ էկրանին։ 😞 «Սյու» | Սեպտեմբերի 19 Հրանտ Աբովյանի դրամայում մի ընտանիք բախվում է ողբերգության․ Սյուզիի և Դավիթի փոքրիկ որդին խեղդվում է անտառի լճում։ Մոր հոգեբանական ծանր ճգնաժամը դառնում է պատմության առանցքը։ Միայն հոգեթերապիան է թվում փրկություն, բայց կնոջը սպասում են շատ ավելի ճակատագրական փորձություններ։ Հուզիչ ու կտրուկ դրամա՝ մարդկային ցավի ու վերականգնման մասին։ 🛍️ «Mallորվածը» | Հոկտեմբերի 9 Գոռ Կիրակոսյանի ֆիլմում Նոր տարվա գիշերը գողերի խումբը փորձում է թալանել առևտրի կենտրոնը։ Բայց ամեն ինչ գլխիվայր շրջվում է, երբ պարզվում է, որ ներսում պատահաբար մնացել է 11-ամյա Արամը։ Երեխան իր հնարամտությամբ խանգարում է ավազակներին, իսկ պատմությունը ստանում է և՛ լարված, և՛ զվարճալի ընթացք։ 👥 «Թանկարժեք տղաները» | Նոյեմբերի 6 Արշո Հարությունյանի նոր ֆիլմը մեծ ու բազմաշերտ ընտանեկան դրամա է։ Տասնյոթ տարի առաջ խառնաշփոթի պատճառով երկու նորածիններ փոխվում են տեղերով։ Մեկը մեծանում է հաջողակ բիզնեսմենի ընտանիքում, մյուսը՝ աղքատության ու պարտքերի մեջ։ Երբ ճշմարտությունը բացահայտվում է, երկու ընտանիքներն էլ կանգնում են դժվարին հարցի առաջ․ ի՞նչ անել, երբ կյանքը մի ակնթարթում փոխում է ճակատագրերը։ ⚽ «Ոսկե դուբլ» | Նոյեմբեր Ռեժիսոր Մհեր Մկրտչյանի սպորտային դրամայում լեգենդար սպարտակովցի Նիկիտա Սիմոնյանը դառնում է Երևանի «Արարատ»-ի մարզիչ։ Նրա նպատակը անհավանական է թվում․ հասնել «ոսկե դուբլի»՝ և՛ առաջնության, և՛ ԽՍՀՄ գավաթի հաղթանակին։ Բայց թիմը չի վստահում նոր մարզչին, իսկ մրցակիցները պատրաստ են ամեն ինչի։ Լարված, էմոցիոնալ և ֆուտբոլային կրքով լի ֆիլմ՝ բոլոր սպորտի սիրահարների համար։ ❄️ «Ձմեռվա երգ» | Դեկտեմբեր Անժելա Ասատրյանի ռոմանտիկ դրաման պատմում է երիտասարդ երաժիշտի մասին, որը փախչելով իր խնդիրներից ու տխրությունից՝ գալիս է Հայաստան։ Այստեղ նա անցկացնում է իր կյանքի ամենահիշվող ձմեռը․ լի երաժշտությամբ, նոր ծանոթություններով ու ինքնաբացահայտմամբ։ Տաք ու հուզիչ պատմություն՝ ձմեռվա մթնոլորտի ֆոնին։ 🎉 «Ֆուլ Հաուս» | Հունվարի 29 Հայկական հեռուստատեսության ամենահանրահայտ սիթքոմերից մեկը տեղափոխվում է մեծ էկրան։ Թեև ֆիլմը մինչև 2025-ի վերջ չի լինի մեր էկրանին, այլ արդեն 2026-ին կկարողանանք դիտել, բայց դրա մասին չպատմել չէինք կարող։ «Ֆուլ Հաուս»-ի հիման վրա ստեղծված գեղարվեստական ֆիլմում կրկին կհանդիպենք Մուշեղին, Ֆելիքսին, Արսենին, Լիկային ու Տաթևիկին։ Սիթքոմը տարիներ շարունակ գրավել է հանդիսատեսին իր հումորով, թեթև կատակներով ու կյանքից վերցված իրավիճակներով։ Ֆիլմը խոստանում է լինել նույնքան զվարճալի, բայց արդեն՝ կինոթատրոնի մեծ էկրանին։ Ինչպես հասկացար, այս աշունը և ձմեռը ԿինոՊարկում հայկական ֆիլմերով հագեցած են լինելու։ Կրիմինալ արկածներից մինչև ընտանեկան դրամա, սպորտային պատմություններից մինչև ռոմանտիկ ու կատակերգական կինո՝ բոլորն էլ պատրաստ են նվիրել նոր էմոցիաներ։ Դե ինչ, կհանդիպենք ԿինոՊարկում՝ հայկական մեծ պրեմիերաների ժամանակ 🎥